Pr/amendamentet kushtetuese, qeveria: Morëm parasysh sugjerimet, pjesërisht

 

Për rrjedhojë, është ndryshuar teksti i amendamentit 34 dhe teksti i amendamentit 36. Propozim amendamentet së bashku me raportin për diskutimet publike i janë dërguar kuvendit, ku duhet të vazhdojë procedura parlamentare.

 

“Nga teksti fillestar i projekt amendamenteve të Kushtetutës së RM-së deri te teksti i tanishëm final, përmes procesit të konsultimeve dhe debateve publike që patëm javën e kaluar, ku morën parasysh diskutimet në Kuvend, ku morën pjesë tetë deputetët e VMRO-së, ku mori pjesë edhe opozita shqiptare, erdhëm në konstatim se dy nga katër amendamentet duhet të pësojnë ndryshime”,- tha zëdhënësi i Qeverisë, Mile Boshnjakoski.

 

Përcaktimi i shqiptarëve si popullsi mbi 20% mbetet edhe më tej kategori kushtetuese, pasi qeveria nuk e ka pranuar sugjerimin e opozitës shqiptare.

 

“Ajo që mund të them tani është se me ndryshimet janë përfshirë edhe një pjesë e sugjerimeve që kishte opozita shqiptare. Këto janë ndryshimet finale që janë dërguar në Kuvend, kështu që procesi vazhdon më tej në formën e paraparë me kushtetutë dhe ligj”,- u shpreh zëdhënësi i Qeverisë, Mile Boshnjakoski.

 

Qeveria dhe shumica parlamentare mbeten të përkushtuara për miratimin e ndryshimeve kushtetuese dhe zbatimin e plotë të Marrëveshjes së Prespës. Plan B nuk ka.

 

“Qeveria është e përkushtuar plotësisht për zbatimin e Marrëveshjes së Prespës, përmes fazës në të cilën jemi tani, përkatësisht amendamenteve kushtetuese që janë në proces, tani sërish në Kuvendin e RM-së. Në tërësi respektojmë dhe zbatojmë të gjitha dispozitat e shënuara në Marrëveshjen e Prespës dhe nuk ka asgjë jashtë saj në procesin e zbatimit. Dje patëm informatë edhe nga Athina se ka shumicë që do ta miratojë marrëveshjen”,- theksoi zëdhënësi i qeverisë, Mile Boshnjakoski.

 

Qeveria konfirmoi se, ekspertët e angazhuar nga Qeveria për hartimin dhe prezantimin e ekspertizave rreth projekt/amendamenteve në diskutimet publike kanë marrë honorare nga 20 mijë denarë.