Zhvillimi i barabartë, ekspertët: dislokimi i administratës, decentralizim funksional

Ekonomistët vlerësojnë se Administrata Publike duhet të dislokohet nga kryeqendra në qytetet tjera të vendit, që të zvogëlohet migrimi dhe të kthehet shtresa e mesme.

 

Këto vlerësime ata i paraqitën në konferencën “Maqedonia Megallopolis”, ku në mesin e problemeve u theksua edhe zhvillimi jo i barabartë rajonal.

 

“Administrata publike të largohet nga Shkupi në 10 qytete. Në këtë formë 145 mijë njerëz do të ndikonin në bruto prodhimin vendor për rreth 20%. Me këtë do të ndërpritej shpërngulja. Sipas vlerësimeve të mija, Maqedonia sot ka një milion e 596 mijë njerëz”,- tha rektori i Kolegjit Amerikan në Shkup, Marjan Bojaxhiev.

 

“Parimet e decentralizimit duhet të analizohen. Duhet të flasim për nivelin optimal të decentralizimit, temë që është e hapur dhe shkakton probleme të mëdha, debate dhe analiza në ekonomitë e ndryshme nacionale. Analizat e vendeve të shumta në tranzicion dëshmojnë se çdo vend që ka tejkaluar 20% në decentralizimin fiskal, përballet me probleme serioze”,- tha kryetari i AShAM-it, Taki Fiti.

 

Infrastruktura ka një rëndësi të veçantë për zhvillimin ekonomik, thotë ministri i transportit, Goran Sugareski.   

 

“Në përputhje me zhvillimin rajonal gjithkund në Maqedoni po ndërtohet. Së shpejti do të jetë gati autostrada Milladinoc – Shtip, ndërsa janë tejkaluar problemet për autostradën Kërçovë-Ohër”,- tha ministri i transportit, Goran Sugareski.

 

Viti 2019 presim të jetë një vit i rëndësishëm për ekonominë e vendit, theksoi ministri Sugareski.