Viti i Ri 2019, atmosferë festive në Tiranë dhe Prishtinë

Atmosferë festive mbretëroi në sheshin Skënderbeu në Tiranë dhe Zahir Pajaziti në Prishtinë, ku performuan emra të njohur të estradës muzikore shqiptare, ndërsa ndërrimin e motmoteve e shënuan spektakle fishekzjarrësh, transmeton “TVM2”. 

FOSHNJA E PARË DJALË NË TIRANË, VAJZË NË PRISHTINË

Në Shqipëri fëmija i parë i lindur në vitin 2019 është i gjinisë mashkullore dhe ka lindur në Tiranë. Kryeministri, Edi Rama, me këtë rast ka shpërndarë çeqet për tre foshnjat e para të lindura këtë vit, edhe atë 120 mijë lek për fëmijën e parë, Aleksin, dhe nga 80 mijë lek për fëmijën e dytë dhe 40 mijë për fëmijën e tretë.

“Gëzuar dhe me këmbë të mbarë! Ky është Aleksi? Ky është i ati? Urime! Aleksi është i treti, ka ardhur me xhepat plot 120 mijë lek të reja. Kjo tani është certifikata e lindjes, që nga sot merret direkt në maternitet dhe nuk ka më nevojë të shkohet në gjendjen civile”,- tha kryeministri i Shqipërisë, Edi Rama.

Në Kosovë fëmija i parë i vitit 2019 është vajzë, ndërsa nëna më e re është Miranda Bajrami.

“Lindja e parë pas mesnatës ka qenë në 00:36 minuta, me lindje operative. Pacientja është  Miranda Bajrami, e lindur në vitin 2000 nga Fushë - Kosova. Foshnja është e gjinisë femër”,- theksoi Naser Berisha nga Klinika e Gjinekologjisë – Prishtinë.

NUK MUNGUAN EDHE NGJARJET TRAGJIKE

Përpos lajmeve të mira nga Kosova dhe Shqipëria, ka pasur edhe njoftime për ngjarje tragjike dhe të lënduar nga fishekzjarrët. Një grua e moshës mbi 50 vjeçare në Gjilan ka humbur jetën, pasi është qëlluar aksidentalisht nga bashkëshorti me armë zjarri.

Në rrugën Podujevë – Prishtinë, një person ka humbur jetën, tre të tjerë kanë pësuar lëndime të rënda.

Derisa Klinika Emergjente në Prishtinë ka trajtuar gjithsej 65 raste. Ndërsa në Fier të Shqipërisë, Viti i Ri ka nisur me një konflikt me armë zjarri. Një 30-vjeçar është plagosur në këmbë pas një sherri në një lokal.(Vlora Latifi – Topojani, TVM2)