ITSHKSH: Viti 2019 , shpallet “Viti i Wilsonit”

Instituti i Trashëgimisë Shpirtërore e Kulturore të Shqiptarëve,  në bashkëpunim me Prishtinën dhe Tiranën, vitin 2019 e ka shpallur si “Viti i Wilsonit”, në shenjë nderimi për ish-presidentin amerikan Thomas Woodrow Wilson (1856–1924), i cili ishte mbrojtësi më i flaktë i Shqipërisë në Konferencën e Versajës në Paris, ku kërkoi  vendosjen e paqes,  mbi parimin e vetëvendosjes së popujve.

 

Gjatë vitit 2019, me një pjesë të bujshme të aktiviteteve hulumtuese-shkencore dhe botuese, punonjësit shkencor të Institutit do të fokusohen gjithashtu edhe në studimet përkatëse albanologjike në rajonin e Pellagonisë, përkatësisht Manastirit.

 

Ndër aktivitetet tjera për këtë vit veçohen: shënimi i 20-vjetorit të luftës së Kosovës dhe eksodit masiv, 100-vjetori i themelimit të Xhemijetit, 100-vjetori i vdekjes së Kolë Bojaxhiut, 70-vjetori i vdekjes së Mid’hat Frashërit, 111-vjetori i Kongresit të Alfabetit, Dita Ndërkombëtare e Arkivave, etj. Nga konferencat shkencore mund të veçohen: “Krerët myslimanë në mbrojtjen e identitetit shqiptar në Maqedoni”, “Ballkanologjia sot – komunikime ndërballkanike”, “Dasmat në trevat shqiptare”, punëtoria “Veshja në fotografi”, etj.

 

Ndërsa, nga projektet hulumtuese, sivjet po fillohet me realizimin e projekteve afatgjata dhe mjaft të rëndësishme, si “Fjalor Enciklopedik (Shqiptarët e Maqedonisë)”, “Lëvizjet kulturore në Maqedoni (shek. XIX-XX)”, etj.

 

Në programin e sivjetshëm vjetor, Instituti ka paraparë të zhvillojë rreth 15 projekte hulumtuese, mbi 20 aktivitete shkencore – promovuese, mbi rreth 30 botime, dhe një sërë aktivitetesh të përbashkëta me Tiranën e Prishtinën, si dhe qendrat e mëdha evropiane dhe amerikane, njoftojne nga ITKSHSHM.