Dialogu Kosovë - Serbi, dokumenti i Kosovës me 9 faqe dhe 9 pika

Nga katër raunde të takimeve në kuadër të dialogut për normalizim të marrëdhënieve ndërmjet Kosovës dhe Serbisë janë 9 çështje specifike, të cilat janë diskutuar me palën serbe dhe ndërmjetësuesen e dialogut, Federica Mogherini.

 

Presidenti, Hashim Thaçi, ka ofruar tashmë për Delegacionin shtetëror në dialog me Serbinë, një dokument informues prej nëntë faqesh. Gjithsesi, dje presidenti Thaçi sqaroi se synim i Kosovës është që të arrijë një marrëveshje gjithëpërfshirëse me Serbinë, e cila do të ishte ligjërisht e obligueshme në rrafshin ndërkombëtar. Sipas tij, një marrëveshje e tillë do t’i siguronte Kosovës ulësen në Organizatën e Kombeve të Bashkuara dhe do t’i hapte perspektivën në integrimet euro-atlantike.

 

Thaçi përsëriti se në kuadër të marrëveshjes finale midis Kosovës dhe Serbisë, edhe komunat në Luginën e Preshevës do të bëhen pjesë e Kosovës. Por, në asnjë rresht të këtij dokumenti informues, një kopje të të cilit e kanë siguruar mediat e Kosovës, nuk përmendet korrigjimi i kufijve. Lugina e Preshevës, Medvegjës dhe Bujanocit përmendet vetëm në kontekst të reciprocitetit me serbët e Kosovës. 

 

Pas takimit me Thaçin, kryenegociatorët, Fatmir Limaj dhe Shpend Ahmeti, thanë se morën pak dokumente dhe sipas tyre, gjithçka do të nisë nga zeroja. Nëpërmjet dokumentit, Zyra e presidentit konfirmon zyrtarisht se deri më tani, BE-ja dhe dy shtetet e përfshira në këtë proces nuk kanë prodhuar asnjë dokument të shkruar zyrtar, i cili do të mund të konsiderohej si një draft fillestar për marrëveshje. Kësisoj, të gjitha çështjet e diskutuara deri më tani janë ende të hapura.