Mario Baloteli largohet nga Milani

 

Klubet kanë rënë dakord në lidhje me shifrat financiare. Liverpuli do të paguajë 20 milion euro për kartonin e futbollistit.

 

Në pritje të zyrtarizimit mbeten për t’u përcaktuar vetëm detajet e kontratës së re të Mario Balotelit.

 

Sipas mediave angleze, lojtari do të firmosë për 4-vjet, ndërsa do të fitojë rreth 6 milion euro në sezon. 

 

Mario Baloteli është një nga lojtarët më të talentuar, por gjithmonë ka qenë në qendër të kritikave për jetën e tij jashtë fushës së lojës.

 

Pikërisht karakteri i vështirë ka ndikuar në karrierën e Balotelit.

 

Në fillim te Interi dhe më pas te Mançester Siti, 24-vjeçari nuk arriti të bëhej kampioni që të gjithë prisnin. Më pas transferimi te Milani.

 

Për shumë u pa si pika e kthesës, por edhe te skuadra italiane Baloteli vuajti në fillim përshtatjen, më pas me dëmtimet dhe mënyrën ekstravagente të jetës jashtë futbollit.

 

Mund të jetë Liverpuli skuadra e duhur, megjithatë trajneri Brajan Roxhers, ashtu si kolegët e tij do ta ketë të vështirë të menaxhojë lojtarin.

 

Me Balotelin që ka prerë biletën drejt Liverpulit, Milani ka gjetur zëvendësuesit e tij në sulm.

 

Përveç Alesio Çerçit, klubi italian po punon për tranferimin e një mes sulmuesit të Mançester Sitit Alvaro Negredo dhe atij të Portos Xhekson Fernandez.