Mey dhe Juncker, bisedime për ndryshimin e Marrëveshjes së Brexitit

Kryeministrja britanike, Theresa May, dhe presidenti i Komisionit Evropian, Jean-Claude Juncker, po bisedojnë për ndryshimin e marrëveshjes së Brexitit.

Sipas tyre, po zhvillohen bisedime “të fuqishme por konstruktive”. Presidenti Juncker ka theksuar se marrëveshja për tërheqje nuk mund të ndryshohet si dëshiron kryeministrja britanike.

Megjithatë ai ka thënë se Bashkimi Evropian është i hapur për ndryshime të termeve në dokumentin që përcakton marrëdhëniet e së ardhmes mes BE-së dhe Britanisë.

Të dy liderët janë pajtuar të takohen për të vazhduar diskutimet para fundit të shkurtit. Ekipi i Britanisë dhe ai i BE-së pritet të rinisin diskutimet për të” gjetur një rrugë ashtu që May të fitojë mbështetjen e shumicës në Parlamentin britanik por edhe të respektojnë udhëzimet e bëra nga Këshilli Evropian”.

Përveç këtyre ekipeve, çështjen e Brexitit do ta diskutojnë edhe Sekretari britanik, Steve Barclay dhe negociatori i BE-së, Michel Barnier, të hënën në Strasburg. Kryeministrja May është duke insistuar që Mbretëria e Bashkuar të mos "bllokohet" në marrëveshjen për kufirin irlandez, që parasheh moskthimin e kontrolleve kufitare, pavarësisht çfarë pakti arrin Mbretëria me BE-në.

Ajo ka thënë se pakti duhet të ndryshojë nëse dëshiron të fitojë mbështetjen e ligjvënësve, që i kanë bërë thirrje asaj të kërkojë “alternative shtesë” kur kanë refuzuar planin në parlament një muaj më parë.

Vendimi për Brexit ka ardhur pasi 52 për qind e votuesve kanë votuar për dalje të Britanisë nga BE-ja në krahasim me 48 për qind që kanë kundërshtuar atë, në referendumin e mbajtur më 2016. Britania pritet të largohet nga BE-ja më 29 mars të këtij viti.