Protesta e banorëve: Të ndalet katastrofa ekologjike në fshatin Konjare

Ata të revoltuar bllokuan qendrën e komunës së Petrovecit dhe kërkojnë nga autoritetet ndërprerjen e menjëhershme të gërmimeve për shkak se me pastrimin e shtratit të lumit, përveç se rrezikohen të mbjellat e tyre, është ulur edhe niveli i ujit  në puset e tyre, burime nga të cilat furnizohen me ujë për pije.

 

“Ne si qytetarë të RMV-së, kërkojmë të ndalohen gërmimet në lumin Pçinja si dhe përreth lumit. Në fushat tona të ndërpriten gërmimet, sepse ne ekzistencën e sigurojmë nga frytet e tokës. Kërkojmë menjëherë të merren masa, pasi është problem shumëvjeçar”,- tha një protestues. 

 

“Iu drejtohem institucioneve të shtetit, në gërmimet përreth lumit nuk ka vetëm katastrofë ekologjike, por ka gjenocid ndaj natyrës. Ky tubim këtu është tubim i 9 vendbanimeve dhe është tubim multietnik dhe nuk është as politik e as për ndonjë interes tjetër”,- theksoi një protestues. 

 

“Sot kemi dalë që të çojmë një mesazh deri tek qeveria, që të tregojmë se këtu nuk ka politikë, por këtu tregojmë hallet e fshatrave. Kërkesat tona janë që të ndalohet gropimi i lumit Pçinja, sepse këtu është ekzistenca e banorëve të vendit tonë, prej të cilit lum edhe ujin për pije e shfrytëzojmë dhe puset kanë filluar edhe të shteren”,- u shpreh një protestues. 

 

Nga kompania e cila e kanë fituar tenderin për pastrimin e shtratit të lumit Pçinja, thonë se nuk bëhet fjalë për katastrofë ekologjike, por për projekt të qeverisë dhe shoqatës aksionare për “Ekonomizimin e ujërave”, e cila ka për detyrë të kthejë gjendjen e mëhershme të shtratit dhe të parandalojë vërshime në të ardhmen.  Nga Ministria e Bujqësisë ishin të pakapshëm për t’u përgjigjur në lidhje me kërkesat e banorëve, ndërsa banorët thonë nëse nuk ndërmerren veprime, protestat do t’i vazhdojnë deri në përmbushjen e kërkesave.