Kandidati konsensual, LSDM dhe BDI sonte e caktojnë kandidatin

LSDM, BDI dhe partitë tjera që janë shprehur të gatshme për kandidat të përbashkët presidencial, sonte pritet të vendosin se cili do të jetë kandidati i tyre. Kreu socialdemokrat, Zoran Zaev, deklaroi se po shqyrtohen 10 kandidatura për të definuar kandidatin konsenzual që pritet të ketë përkrahjen e 25 subjekteve politike.

 

“Do të mblidhemi të gjithë, jemi në koordinim me të gjitha partitë politike të cilat shprehën gatishmëri të mbështesin kandidatin e përbashkët. Po shqyrtohen dhjetë emra, kemi edhe favoritët tanë pasi qytetarët na kanë dhënë porosi të qartë se çfarë duan të shohin te presidenti i ardhshëm i vendit. Do t’i marrim të gjitha aspektet analitike në aspekt që presidenti i ardhshëm i Maqedonisë së Veriut të jetë president i të gjithë qytetarëve, të gjithë ta ndjejnë si presidentin e tyre dhe besojmë se do të jetë motiv i mjaftueshëm që të kemi dalje sa më të madhe në zgjedhje”,- deklaroi kryeministri, Zoran Zaev.

 

Sipas paralajmërimeve të LSDM-së, emri i kandidatit konsensual që do të garojë në presidenciale do të duhet të konfirmohet edhe në kongresin partiak të së dielës, ndërsa të njëjtën do ta bëjnë edhe organet e partive tjera që do ta mbështesin të njëjtin. Jozyrtarisht emra më të komentuar për kandidat konsensual janë Radmilla Sheqerinska, Oliver Spasovski, Nikolla Dimitrov dhe Stevo Pendarovski.