Merkel: përgjimi në shërbim të sigurisë

Shërbimi i inteligjencës gjermane është udhëzuar që të mbledhë informacione në shërbim të sigurisë, ka deklaruar kancelarja gjermane, Angela Merkel, e pyetur për çështjen e përgjimit të Shqipërisë dhe Turqisë. “E para, duhet të kuptoni se nuk jap detaje nga puna e BND-së.

 

Së dyti, shprehja “nuk duhet të ketë spiunazh mes miqsh” është thënë në kontekstin e aktiviteteve të Shteteve të Bashkuara të Amerikës. Ky kontekst është i rëndësishëm.

 

Në fund, BND-së i është kërkuar që të sigurojë nga jashtë të gjithë informacionin e nevojshëm për sigurinë tonë. Dhe nga brenda, llogaridhënia i përket Zyrës Federale për Mbrojtjen e Kushtetutës.

 

Dhe unë besoj, sidomos duke pasur parasysh kërcënimet në rritje, që puna e shërbimeve të inteligjencës do të na duhet edhe më tej,” ka thënë Merkel në një intervistë për televizionin publik, ARD. 

 

Ndryshe revista gjermane, “Der Spiegel”, ka publikuar se Shërbimi Sekret i Gjermanisë ka spiunuar Shqipërinë prej disa vitesh për të mbajtur nën kontroll “krimin e organizuar”.

 

Raporti, u botua vetëm një javë pasi e njëjta reviste, “Der Spiegel”, zbuloi se inteligjenca gjermane kishte përgjuar një bisedë telefonike të bërë nga sekretari amerikan i Shtetit, John Kerry, si dhe kishte spiunuar edhe Turqinë. 

 

Aferat e përgjimit kanë tensionuar raportet mes SHBA-ve dhe Gjermanisë, por edhe ato turko-gjermane. Ambasadori gjerman në Ankara, është thirrur nga përfaqësues të Qeverisë për të dhënë shpjegime brenda kësaj jave, lidhur me përgjimin.

 

Po ashtu skandalet e përgjimit ishin shkas për largimin e shefit të stacionit të CIA-s në Gjermani nga posti i tij, pasi më herët Qeveria gjermane ankohej se Uashingtoni kishte kryer operacione intensive spiunazh në Gjermani, duke përfshirë dhe përgjimin e celularit të kancelares, Angela Merkel, kur kjo e fundit pati deklaruar se miqtë nuk duhet të përgjohen.