“Dhuna në Qendër”, prezantohen video xhirimet nga mediat. Rastet e PSP-së, anulohet “Titanik” dhe “Lëndina”

Për ish ministrin e transportit, Mile Janakievskin, ajo që ndodhi në mbledhjen e këshillit të komunës Qendër gjatë diskutimeve për planin e ri urban, nuk ka asnjë ndryshim nga ajo që ndodhi gjatë “Revolucionit laraman”, ku protestuesit ngjyrosën institucionet dhe u konfrontuan me policinë.

 

Bashkë me Janakievskin, në rastin e njohur si “Shuplaka”, akuzohen edhe ish kryeministri, Nikolla Gruevski, dhe deputetja aktuale e VMRO-DPMNE-së, Daniella Rangellova, për nxitje dhe ushtrim të akteve të dhunës ndaj ish kryetarit të komunës Qendër, Andrej Zhernovski, dhe këshilltarëve të LSDM-në në opozitë në atë kohë.

 

Pjesëmarrja e Janakievskit në rastin “Dhuna në Qendër” detyroi gjykatën të anulojë rastin tjetër “Titanik”, në të cilin Janakievski sërish është në mesin e të pandehurve bashkë me 21 persona, përfshirë ish kryeministrin Gruevski, ish-ministren e brendshme, Gordana Jankullovskën, Martin Protugjerin, Kiril Bozhinovskin etj.

 

Nuk u dha sqarim përse dy seancat me të njëjtin të pandehur janë caktuar në të njëjtën kohë, por seanca e radhës për “Titanik” u  caktua për 8 mars.

 

U anulua për më 29 mars edhe rasti i tretë i PSP-së për sot “Lëndina”, për shkak të mungesës së të akuzuarit, Dragan Pavlloviq – Latas, për arsye shëndetësore.

 

Në këtë rast, të akuzuar bashkë me Latasin janë edhe vëllezërit e tij, Sërgjan dhe Zvezdan, për  ndërtimin e paligjshëm të tre vilave në Zelenikovë, edhe pse nuk posedonin lejet e nevojshme për ndërtim.