Kumanovë, shënohet 7 marsi – Dita e Mësuesit

Në të gjitha shkollat fillore dhe të mesme me mësim në gjuhën shqipe, me aktivitete të shumta u shënua 7 marsi – Dita e Mësuesit. Manifestimi qendror për komunën e Kumanovës dhe Likovës u mbajt në Pallatin e Kulturës në Kumanovë, nën organizim të Shoqatës së arsimtarëve shqiptarë “Naim Frashëri”.

Në praninë e arsimtarëve, nxënësve e  mysafirëve të shumtë, referatin e paraqiti nënkryetari i ShASh “Naim Frashëri”, Suat Daipi.

“Jemi të lumtur që sot, të lirë dhe pa pengesa, festojmë këtë ditë edhe ne ShASh, e cila ka meritat e saj të veçanta për kontributin e dhënë në pavarësimin e arsimit shqip. Shekuj me radhë shqiptarët luftuan për të drejtën e tyre, shkollimin në gjuhën amtare, e cila e drejtë për vite me radhë u ishte mohuar nga pushtuesit. Në Kumanovë me vitin 1909 u hap shkolla e parë në gjuhën shqipe me mësues Jashar Erepanin. Për ta mbajtur gjallë shkollën shqipe, mësimdhënësit kanë bërë sakrifica të mëdha, prandaj në këto kushte lindi sistemi kombëtar edukativo-arsimor”,- theksoi mes tjerash Suat Daipi nga ShASh “Naim Frashëri” - dega Kumanovë-Likovë.

Njëherit u ndanë mirënjohje për arsimtarët e dalluar si dhe nxënësit për suksese të arritura në fusha të ndryshme të diturisë.  Pjesë e manifestimit ishte edhe një program i pasur kulturo-zbavitës me këngë e valle dhe recitime. (Fatlum Aqifi, TVM2)