Rasti “Thesari", furnizimet e DSK-së jashtë normave ligjore

Ish ndihmës ministri i punëve të brendshme, Gjoko Popovski, i gjykuar në rastet "Tanku" dhe "Treqind" në deklaratën e tij si dëshmitar i PSP-së në rastin "Thesari", ka shpjeguar sigurimin jolegal  të pajisjeve për ndjekjen e komunikimeve nga Britania e Madhe.

 

Popovski para trupit gjykues ka sqaruar se pajisjet për nevojat e kësaj drejtorie, zakonisht janë siguruar në mënyrë shumë konfidenciale dhe asnjëherë në bazë të Ligjit për furnizime publike. 

 

 

Në mesin e dëshmive si pjesë e këtij procesi gjyqësor ishin edhe bisedat e përgjuara mes ish funksionarëve brenda dhe jashtë MPB-së.

 

Në bisedën telefonike mes ish drejtorit të DSK-së, Sasho Mijallkov, dhe vëllait të tij, Vllatko Mijallkov, i cili drejtonte me doganat, jepen udhëzime për pajisjet e porositura për DSK-në, e të cilat kanë arritur në aeroport.

 

Në bisedat telefonike mes tjerash theksohet se bëhet fjalë për pajisje të sofistikuar dhe sensibile, e cila është mjaft konfidente dhe nuk guxon të hapet. 

 

Në rastin "Thesari" i akuzuari i parë është ish drejtori i DSK-së, Sasho Mijallkov, ish shefi i kabinetit të tij, Toni Jakimovski, ish ndihmësministri në MPB, Nebojsha Stajkoviq, dhe ish shefi i Drejtorisë së pestë pranë MPB-së, Goran Grujevski.

 

Të akuzuarit në këtë rast ngarkohen për keqpërdorim të detyrës dhe autorizimeve zyrtare dhe dëmtim të buxhetit gjatë sigurimit pajisjeve elektro-komunikuese për nevojat e Drejtorisë së pestë dhe trajnimin për shfrytëzimin e saj nga një kompani nga Britania e Madhe në lartësi prej 820 mijë euro.

 

Ndryshe, në Gjykatën Penale, seancë gjyqësore është zhvilluar edhe për rastin "TNT", që ka të bëjë me rrënimin e objektit "Kosmos" në pronësi të Fiat Canovskit.

 

Seanca është zhvilluar me deklarimin e këshilltarit teknik në sferën e gjeodezisë. Në lëndën “TNT”, mes të akuzuarve janë ish-kryeministri, Nikolla Gruevski, ish-ministri i transportit dhe lidhjeve, Mile Janakieski, dhe ish-kryetari i komunës së Gazi Babës, Toni Trajkovski.