Osmani: Papa, i mirëseardhur në vendlindjen e nënë Terezës

Në prag të vizitës së kreut të Kishës katolike, Papa Françesku në vendin tonë, zëvendës kryeministri për Çështje Evropiane Bujar Osmani, u takua sot me peshkopin e Shkupit dhe kryesuesin e Kishës katolike Romake në Republikën e Maqedonisë së Veriut, Kiro Stojanov.

 

“Është nder i veçantë që Papa Françesku do ta vizitojë Maqedonisë e Veriut, si simbol i orientimit tonë shoqëror dhe civilizues drejt Evropës dhe vlerave perëndimore. Kënaqësi e veçantë është që Papa do ta vizitojë Shkupin, vendlindjen e Nënës Terezë si mirënjohje për kontributin tonë në humanizmin, solidaritetin dhe mirësinë botërore”, theksoi Osmani në takim, duke potencuar në traditat dhe marrëdhëniet e mira mes bashkësive të ndryshme fetare në Republikën e Maqedonisë së Veriut, përfshirë edhe komunitetin fetar katolik romak. Osmani shprehu besim se Qeveria do të sigurojë trajtim të përshtatshëm dhe mbështetje logjistike për organizimin e suksesshëm të vizitës së Papës. 

 

Në takim u hap edhe çështja e  bashkëpunimit  mes bashkësive fetare në Republikën e Maqedonisë së Veriut dhe përfaqësuesve të shtetit, si dhe marrëdhëniet mes vetë bashkësive fetare .  Bashkëbiseduesit iu referuan dialogut mes bashkësive dhe vendit me qëllim të ndërtimit të shoqërisë funksionale multi – konfesionale, thuhet në njoftimin e shërbimit për informim të kabinetit të zv kryeministrit Osmani.