Ligji për fatin e PPS-së, Arsovski: S’ekziston variant i pranueshëm për VMRO-në

Grupet punuese për Ligjin për Prokurori Publike, për të tretën herë, përfunduan pa rezultat.

Përpjekjet janë më shumë formë se përmbajtje, pasi opozita e kryesuar nga VMRO-DPMNE kurrë nuk do të mbështesë punën e Prokurorisë Speciale, thotë analisti politik, Petar Arsovski.

Sipas tij, çelja e bisedimeve për anëtarësim në BE është disfavor politik për opozitën, prandaj do të vazhdojë obstruksionet për të penguar miratimin e propozim ligjit për ndryshimin dhe plotësimin e Ligjit për Prokurori Publike, i cili parasheh rregullimin e statusit të PPS-së.

“Mendoj se opozita nuk do ta mbështesë punën e Prokurorisë Publike Speciale, pasi mendoj se strategjia e tyre politike është që të presin zgjedhjet e radhës parlamentare pa datë për bisedime. Në këtë kuptim nuk jam i sigurt se ekziston variant për Ligjin për Prokurori Publike dhe vazhdimin e PPS-së, të cilin opozita mund ta pranojë”,- deklaroi analisti politik, Petar Arsovski.

Procesi për të zbardhur dhe gjykuar rastet nga përgjimet e paligjshme duhet të vazhdojë, jo sepse këtë e kërkon Brukseli, por për të rikthyer sundimin e shtetit ligjor, prandaj Arsovski thotë Ligji mund dhe duhet të miratohet dhe se përveç shumicës parlamentare dhe opozitës shqiptare, është e mundur të sigurohet edhe mbështetja e grupit të pavarur të VMRO-DPMNE-së, prej 8 deputetësh.

“Mbështetja e tetë deputetëve, teoretikisht është e mundur, por nuk besoj se do të jetë e mundur pa ndonjë pako më të gjerë për PPS-në”,- theksoi analisti politik, Petar Arsovski.

Kryeministri, Zoran Zaev, tashmë ka marrë mbështetjen e opozitës shqiptare, Aleancës për Shqiptarët dhe Lëvizjes BESA. Por, përkundër ngutjes së qeverisë për të miratuar këtë ligj sapo të sigurohen 80 vota, pr/ligji nuk do të vihet në plenare papërfunduara zgjedhjet presidenciale. Të paktën, kështu deklaroi kryeparlamentari Xhaferi. (Shpëtim Nuredini, TVM2)