Obama: Rusia është përgjegjëse për Ukrainën
Shtetet e Bashkuara të Amerikës, akuzojnë Rusinë për situatën dhe dhunën në Lindje të Ukrainës.....
Presidenti amerikan, Barack Obama, duke u bazuar në pamjet satelitore, thotë se luftimet në këtë zonë nuk janë pasojë e një kryengritjeje të brendshme, por vijnë si pasojë e përfshirjes së thellë të Rusisë. Ai fajësoi Moskën për përshkallëzimin e situatës. Këtë vlerësim e ka dhënë edhe kryeministri i Australisë, se separatistët janë stërvitur nga Rusia.
“Nuk ka më asnjë dyshim se kjo nuk është më një kryengritje e brendshme. Separatistët janë të stërvitur, të armatosur dhe të financuar nga Rusia. Ajo vazhdimisht ka shkelur sovranitetin dhe integritetin territorial të Ukrainës dhe fotot e reja të trupave ruse brenda vendit i mundësojnë botës që të shohë situatën reale”- deklaroi presidenti i SHBA–ve, Barack Obama.
“Kjo që e bën Rusia është invazion dhe është më se e qartë se forcat pro-ruse janë duke u shpërngulur përtej kufijve. Ne e dënojmë këtë veprim dhe konstatojmë se kjo që po ndodh në Ukrainë është agresion i Rusisë, i cili ka për qëllim të tregojë vetëm pushtet”- theksoi kryeministri i Australisë, Tonz Aboot.
Për krizën në Ukrainë do të diskutohet bashkë me liderët evropian edhe në Samitin e NATO-s që mbahet javën e ardhshme në Mbretërinë e Bashkuar.
Rasmusen, i bëri thirrje Rusisë që t’i ndërpresë të gjitha aktivitetet luftarake ndaj Ukrainës.
“Rreptësisht e dënojmë mosrespektimin e rregullave ndërkombëtare që bëhen muajve të fundit nga ana e Rusisë. Ne i bëjmë thirrje Rusisë që t’i ndërpresë të gjitha veprimet luftarake jolegale dhe mos të japë më asnjë lloj mbështetje ndaj separatistëve”- tha Andres Fog Rasmusen nga NATO.
Në këtë takim, i pranishëm do të jetë edhe shefi i Shtëpisë së Bardhë, presidenti Obama. Tani për tani nuk ka informata nga Shtëpia e Bardhë se a do të përgatitet një përgjigje ushtarake ndaj Rusisë. Obama nuk dha përgjigje të saktë rreth kësaj çështje, por konstatoi se Rusia do të paguaj më shumë kosto dhe pasoja për veprimet e saj në Ukrainë.
Në një raport të ri të Kombeve të Bashkuara, sot raportohet se në konfliktin luftarak në pjesën lindore të Ukrainës janë vrarë afro 2.600 persona ukrainas nga ana e separatistëve pro- rusë.( Rexhep Qamili, TVM2)