Pavarësia e rregullatorit të mediave, ASHMAA: Qeveria nuk i respekton rekomandimet

Pas vendimit të Qeverisë që të kthejë për rishqyrtim Strategjinë rregullatore për zhvillim të veprimtarisë audio dhe audio-vizuele në 5 vitet e ardhshme, me arsyetimin se e njëjta që nuk është harmonizuar me dokumentet tjera strategjike, kanë reaguar nga Agjencia për Shërbime Mediatike Audio dhe Audiovizuele, nga e cila thonë se Qeveria nuk po i respekton rekomandimet e Brukselit për pavarësinë e rregullatorit për mediat. Qeveria po i tejkalon kompetencat e saj dhe vepron në kundërshtim me rekomandimet e raporteve të Komisionit Europian dhe rekomandimet e Këshillit të Evropës, për garantimin e pavarësisë së trupave rregullatorë në fushën e mediave, thonë nga ASHMAA.

 

Në rekomandimin kyç të Këshillit të Evropës për pavarësinë dhe funksionimin e trupave rregullatorë, theksohet se autoritetet publike nuk guxojnë të ndikojnë në pavarësinë e rregullatorëve mediatikë. Qëllimi bazë i këtyre rekomandimeve, potencojnë nga Agjencia, është të parandalohen pikërisht këto ndërhyrje të pushtetit ekzekutiv në punën e rregullatorëve.

 

Nga ASHMAA sqarojnë se Strategjia është dorëzuar në Qeveri, Kuvend dhe Ministrinë e Administratës Publike, jo për miratim, por si informacion për gjendjet rrjedhëse në sferën mediatike, si dhe për aktivitetet që do t’i ndërmarrë Agjencia në pesë vitet e ardhshme, në drejtim të përmirësimit të aspekteve të caktuara në fushën e mediave. Kjo strategji nuk është e papajtueshme me, siç citon Qeveria, dokumentet tjera strategjike për zhvillim të kësaj fushe, marrë parasysh se dokumente të tilla nuk ekzistojnë, potencojnë nga ASHMAA.