Kuvend, Grubi: Drejtësia selektive, po dëshmohet. Micevski: Dy vite flasim për drejtësi selektive

Me akuza për drejtësi selektive nisi seanca plenare në Kuvend, ku në rend dite ishte caktuar rivotimi i ligjeve reformuese të cilat nuk i nënshkroi presidenti, Gjorge Ivanov. BDI kërkoi që të diskutohet për rastin e dënimit të dy të rinjve shqiptarë me nga 19 vite burg dhe ngjarjet në BFI. Për këtë arsye kërkuan që fillimisht në rend dite të jetë Ligji i plotësuar për Këshillin Gjyqësor. Këtë propozim të deputetit, Artan Grubi, e mbështetën të gjithë deputetët në sallë, përfshirë edhe ata të VMRO-DPMNE-së.

 

“Ngjarjet e fundit të cilat ndodhën në veçanti dje në BFI të RMV-së, me ndërhyrje më brutale të mundshme e cila është absolutisht e papranueshme. Po të njëjtën ditë ndodhi edhe një aktgjykim njëjtë skandaloz ku u dëshmua drejtësia selektive, qoftë në bazë etnike, qoftë në bazë fetare, qoftë në bazë partiake. Gjykohen dy të rinj me 19 vjet burg në veprimin e parë”,- tha Artan Grubi nga BDI.

 

“Drejtësinë selektive VMRO-DPMNE e flet më shumë se dy vite. Më vjen keq që z. Artan Grubi edhe pse dy vite e mbështet këtë Qeveri, pa se drejtësia selektive është e pranishme. VMRO-DPMNE flet për këto punë dhe VMRO-DPMNE është nën sulm të drejtpërdrejtë nga kjo Qeveri dhe gjithë asaj që ndodh, pa u hapur asnjë lëndë kundër partive në pushtet dhe pa përfshirë funksionarët e saj”,- tha Nikolla Micevski nga VMRO-DPMNE.

 

Koordinatori i BDI-së, Ejup Alimi, kërkoi pauzë që të organizohen për debatin për Ligjin për Këshillin Gjyqësor, duke e cilësuar gjyqësorin selektiv dhe antishqiptar bazuar në dënimin me nga 19 vite burg të dy të rinjve, por edhe për rastin e  BFI-së. Fillimisht u vendos që të votohen ligjet që presidenti Ivanov i ktheu në Kuvend pa i dekretuar.