Ministri Neziri në shënimin e “Ditës së minatorit”

Me rastin e “Ditës së minatorëve”, ministri i Ekonomisë, Bekim Neziri, sot ka ndarë mirënjohje për minatorët më të mirë. Ceremonia solemne u organizua në Kompaninë “Renova” në Xhepçishtë të Tetovës. Pronari i kësaj Kompanie, Shefki Idrizi, falënderoi ministrin Neziri që zgjodhi Kompaninë “Renova” për të nderuar minatorët e veçantë.

 

“Kam nder që sot tu shoh këtu në këtë ditë të madhe të organizuar nga Ministria e Ekonomisë, ku vlerësoj se kjo është një ditë e veçantë ku vlerësohen njerëzit e veçantë, sepse duart e minatorëve janë ato që u japin njerëzve gjithçka rreth zhvillimit të madh të ekonomisë. Dua tu falënderoj për prezencën dhe organizimin që u bë në oborrin e Kompanisë “Renova””- tha pronari i Kompanisë “Renova”, Shefki Idrizi.

 

Ministri i Ekonomisë, Bekim Neziri, theksoi se minatorët paraqesin resurs shumë të çmuar njerëzor dhe për këtë shkak Ministria e Ekonomisë është e detyruar që tu sigurojë kushte më të mira për punë. Ministri Neziri, po ashtu theksoi se minierat janë krenaria jonë kombëtare, duke vlerësuar lart punën e Kompanisë “Renova”.

 

“Nuk ka dyshim se minierat tona janë krenaria jonë, midis tyre është edhe nikoqiri i sotëm i Fabrikës “Renova” në Xhepçishtë, e cila me punën e saj dhe rezultatet e arritura është një ndër dëshmitë kryesore për suksesin që kanë koncensionerët tanë, siç është “Renova”. Përveç tre minierave, për shfrytëzimin e shërbimeve mineraleve ka zgjeruar prodhimin e tij edhe në vendet fqinje, ndërsa produktet e kësaj fabrike janë të njohura për cilësinë e tyre edhe në vendet e Lindjes së Mesme”- theksoi ministri i Ekonomisë së Maqedonisë, Bekim Neziri.

 

Sipas ministrit të Ekonomisë, Bekim Nezirit, dikasteri që ai drejton do të vazhdojë aktivitetet e planifikuara në sektorin e minierave, duke i kushtuar vëmendje të veçantë këtij segmenti ekonomik, drejtë rritjes së qëndrueshme dhe zhvillimit të qëndrueshëm ekonomik, duke krijuar një marrëdhënie partneriteti me potencialin njerëzor që punon në këto miniera.