Qeveria: Vaksinimi i obligueshëm për regjistrim

Në shkollat fillore të vendit ka nisur regjistrimi në klasë të parë, që do të vazhdojë deri në fund të këtij muaji. Por, ditën e parë nuk u vërejt interesim i madh për regjistrim.

SADIKU: NXËNËSIT MUND TË REGJISTROHEN VETËM ME DOKUMENTACION TË KOMPLETUAR

Drejtori i Shkollës Fillore “Liria” në Çair të Shkupit, Talat Sadiku, doli me apel që regjistrimi të bëhet në kohë për shkak të furnizimit me libra. Po ashtu obligim i patjetërsueshëm këtë vit është edhe fakti që përskaj dokumenteve tjera duhet dorëzuar edhe kalendari për imunizimin e nxënësit, sepse pa kompletimin e dokumenteve nxënësi nuk do të mund të regjistrohet.

“Për t’u regjistruar në klasë të parë duhet të plotësojë së pari moshën dhe më pas duhet të posedojë certifikatën e lindjes, certifikatën nga mjeku që ka marrë vaksinat, po ashtu edhe certifikatë nga stomatologu dhe duhet të posedohet një letër i njërit prind për të dëshmuar se nxënësi graviton në këtë shkollë”,- tha drejtori i Sh. F. “Liria”, Talat Sadiku.

Nga Qeveria janë decid, këtë vit shkollor nuk do të mund të regjistrohen nxënësin në klasë të parë të cilët nuk do dorëzojnë karton për vaksinim.

“Vaksinimi është i obligueshëm sepse ligji për arsim fillor, neni 46, alinea 2, është i qartë. Edhe Ministria e Shëndetësisë punon në vaksinimin në teren, por edhe Ministria e Arsimit koordinohet me Ministrinë e Shëndetësisë, sepse kemi për qëllim ngritjen e nivelit të imunizimit me qëllim që ta parandalojmë epideminë e morbilit”,- tha zëdhënësi i Qeverisë, Mile Boshnajkovski.

Zëdhënësi qeveritar njëherit thekson se shkollimi fillor është i obligueshëm, por po ashtu fëmijët patjetër duhet të vaksinohen. (Flutura Latifi, TVM2)