Tiranë, bomba, fishekzjarre dhe gaz, pamje ”lufte” te Kuvendi. Turma largohet nga të gjitha anët

Në këto momente janë hedhur bomba molotov dhe janë ndezur fishekzjarre, ndërsa policia është përgjigjur me gaz lotsjellës.

 

Si pasojë e gazit që është hedhur, turma është shpërndarë me shpejtësi. Duke qenë se zona është e ngushtë, pasojat e gazit janë shumë të mëdha dhe qytetarët janë larguar nga të gjitha anët.

 

Protesta përpara Kryeministrisë zgjati për rreth dy orë, ku nuk munguan as aktet e dhunshme, ndërsa drejt zyrës së Ramës u hodhën bomba molotov dhe shishe me benzinë.

 

Derimë tani raportohet për dy punonjës policie dhe dy qytetarë që kanë mbetur të lënduar si pasojë e përplasjes.

 

Fillimisht u tha se qytetarët nuk do të ndryshonin vendndodhje gjatë ditës së sotme, po ka pasur një ndryshim skenari në minutat e fundit, dhe është bërë zhvendosja drejt Kuvendit.

 

Kjo është protesta e katërt kombëtare e cila zhvillohet përpara kryeministrisë nga opozita e bashkuar, që prej vendimit për të djegur mandatet e deputetëve të PD-së dhe të LSI-së.

 

Kërkesat e partive opozitare janë të qarta, dhe lidhen me mbajtjen e zgjedhjeve pa Edi Ramën kryeministër, dhe krijimin e një qeverie tranzitore, e cila do të mundësojë mbarëvajtjen e tyre.

 

Me kalimin e javëve vendosen në pikëpyetje dhe zgjedhjet lokale të 30 Qershorit, që sipas opozitës nuk do të mbahen, ndërsa qeveria Rama dhe PS janë angazhuar me zgjedhjen e kandidatëve në mbledhjen e sotme të Asamblesë.