“Fshesa” e Zaevit, Osmani: Fati i shtetit më me rëndësi se fati i individëve

Ndryshimet në ekzekutiv të paralajmëruara nga kryeministri Zaev, ende nuk janë diskutuar mes dy partnerëve më të mëdhenj të koalicionit. Kjo temë pritet të diskutohet në takimin e parë mes liderëve të BDI-së dhe LSDM-së, Ali Ahmetit dhe Zoran Zaevit, sapo ky i fundit të kthehet nga pushimi. Por, zëvendëskryeministri për eurointegrime, Bujar Osmani, thotë se fati i individëve të caktuar në ekzekutiv është “i parëndësishëm” krahasuar me periudhën e rëndësishme në të cilën gjendet vendi ynë aktualisht. 

 

“Ka çështje më të mëdha se fati individual i çdo njeriu, madje edhe i të gjithë qeverisë. Kemi para çështjen më historike për shtetin, jemi në hapat e fundit të një maratone 20 vjeçare dhe vërtet nuk guxojmë që këtë temë ta ulim në nivelin e pyetjeve se ku do të shkojnë një pjesë e funksionarëve. Ju e dini që kryeministri nuk ka qenë këtu këto ditë, sapo të kthehet në takimin mes dy partnerëve më të mëdhenj të koalicionit do të diskutohet edh kjo çështje”,- tha zëvendëskryeministri për çështje europiane, Bujar Osmani.

 

 

Zëvendëskryeministri i angazhuar për çështje ekonomike, Koço Angjushev, është tërësisht i relaksuar sa i përket ”fshesës” së paralajmëruar. Angjushev thotë se ndryshimet në ekzekutiv janë ekskluzivisht kompetencë e kryeministrit. 

 

“Është nder por gjithashtu edhe mund që  të jesh pjesë e Qeverisë. Unë mund t’ju them lirisht se të gjithë ata të cilët marrin funksione shtetërore duhet të jenë të vetëdijshëm se një ditë do ta lënë të njëjtin. Unë jam i relaksuar tërësisht për këtë çështje, ajo është në kompetenca të kryeministrit”,- theksoi zëvendëskryeministri për çështje ekonomike, Koço Angjushev.

 

Ndryshimi i funksionarëve të caktuar jo vetëm në nivele të larta por edhe ata të niveleve më të ulëta të ekzekutivit që nuk e kanë kryer si duhet punën e tyre, u paralajmërua nga kryeministri si reflektim i asaj që ai e cilësoi mesazh i pranuar i qytetarëve pas rezultateve në rrethin e  parë të presidencialeve.