Zgjedhjet në Parlamentin Europian, euroskeptikët mund të fitojnë shumicën

Votuesit në BE do të zgjedhin 751 deputetë të Parlamentit Europian nga 23 deri më 26 maj, por ndryshe nga herët e kaluara, ekuilibrat pritet të përcaktohen nga euroskeptikët, që sipas sondazheve të  fundit, mund të formojnë grupin më të madh parlamentar.

Sondazhet e fundit sugjerojnë se partitë euroskeptike mund të fitojnë deri në 35% të vendeve të parlamentit europian.

Gazeta britanike Observer shkruan se populizmi nacionalist është në rritje në gjithë europën dhe se Britania e Madhe nuk përbën përjashtim.

Pas problemeve të vërejtura me BREXIT-in, tani populistët kanë ndryshuar strategji dhe në vend të daljes kërkojnë ndryshime brenda Unionit.

Partia e BREXIT-it, kryeson sondazhet në prag të zgjedhjeve sukses, që sipas gazetës, i dedikohet pjesërisht aftësisë së populistëve për të shfrytëzuar pakënaqësitë me qeveritë e tanishme.

“Uashington post” kujton se presidenti francez, Emmanuel Macron, erdhi në pushtet në vitin 2017 me një platformë pro-europiane, por dy vjet më vonë, ai dhe partia e tij mund të dobësohen, marrë parasysh rezultatet e dobëta në zgjedhjet lokale dhe forcimin e partive nacionaliste.