Tsipras i vë kushte Shqipërisë: Nuk ka negociata pa respektuar minoritetin grek

Kryeministri grek, Alexis Tsipras, ka bërë të qartë për Tiranën zyrtare që të mos presë hapje të negociatave, nëse nuk respekton të drejtat e minoritetit grek.

“Nëse Shqipëria përmbush detyrimet e saj për të drejtat e njeriut, Greqia dhe unë personalisht do të mbështes një vendim të mundshëm në qershor për Shqipërinë dhe Maqedoninë e Veriut për të filluar proceset e pranimit të BE-së së bashku. Por, ne nuk do të rrezikojmë procesin e pranimit për Maqedoninë e Veriut, nëse ajo ka bërë përparim. Kjo do të ishte e padrejtë”,- ka potencuar Tsipras në një intervistë për “Financial Times”.

Përveç minoritetit grek në Shqipëri, kryeministri grek është ndalur edhe në çështjet e tjera të pazgjidhura me Shqipërinë.

Teksa e cilësoi marrëveshjen e emrit të arritur me Maqedoninë e Veriut si historike për faktin e vështirësive që ajo mbarte në vetvete, kryeministri grek theksoi se e njëjta logjikë duhet të ndiqet edhe me Shqipërinë, duke përfshirë kufijtë detar, ligjin teknik të luftës që ka ekzistuar mes dy vendeve që nga viti 1945 si dhe statusin e minoritetit etnik grek, aktualisht të ngecura pas një dialogu premtues të nisur në nëntor të 2017-s.