Bashkëpunimi Maqedonia e Veriut – Kosova, kuvendi votoi, njihen reciprokisht lejet për vozitje
Me 76 vota për, asnjë të përmbajtur dhe asnjë kundër...
Me 76 vota për, asnjë të përmbajtur dhe asnjë kundër, kuvendi miratoi Ligjin për ratifikimin e marrëveshjes ndërmjet Qeverisë së RMV-së dhe Republikës së Kosovës për njohje reciproke të lejeve për vozitje.
“Konstatoj se kuvendi e miratoi Ligjin për ratifikimin e marrëveshjes ndërmjet Qeverisë së RMV-së dhe Qeverisë së Republikës së Kosovës për njohje reciproke të patentë shoferëve”,- tha kryetari i kuvendit, Talat Xhaferi.
Avancimi dhe thellimi i marrëdhënieve bilaterale dhe bashkëpunimi operativ është në interes të përbashkët për dy vendet, tha zëvendësministri i jashtëm, Andrej Zhernovski.
“Në bazë të reciprocitetit, kjo marrëveshje do të mundësojë procedura efikase dhe të shpejta për pranimin e lejeve për vozitje të atyre që kanë vendbanim të lejuar apo të përkohshëm ligjor edhe në RMV edhe në Republikën e Kosovës”,- tha zëvendësministri i jashtëm, Andrej Zhernovski.
Ilija Dimovski nga VMRO-DPMNE pyeti zëvendësministrin e jashtëm për ndërtimin e autostradës Shkup - Bllacë dhe banorët e Gorës në Kosovë.
“Ka probleme më të mëdha të cilat kjo qeveri dëshmoi se nuk ka kapacitet. Nëse ka mundësi të marr përgjigje për aktivitetet rreth ndërtimit të autostradës Shkup - Bllacë dhe aktiviteteve për mbrojtjen e të drejtave identitare, kulturore të bashkatdhetarëve tanë në jugperëndim të Kosovës”,- u shpreh Ilija Dimovski nga VMRO-DPMNE.
“Janë siguruar mjete pikërisht nga instrumenti për Ballkanin Perëndimor që janë 20 milion euro për aksin e parë dhe 27 milion euro për aksin e dytë. Se vërtetë është ajo që thatë se është e nevojshme të ndërtohet ky aks dhe kur të mbyllet kjo pjesë e korridorit do të përfitojmë qarkullim më të madh të qytetarëve, por edhe funksionim më efikas të sektorit të biznesit”,- tha zëvendësministri i jashtëm, Andrej Zhernovski.
Mjetet financiare u ndahen atyre që përparojnë në procesin eurointegrues. Menjëherë pas marrjes së këtyre mjeteve të fillojmë me realizimin, tha Zhernovski. (Naim Ramadani, TVM2)