Lufta kundër korrupsionit, KShPK “shoshit” keqpërdorimet e buxhetit

Komisioni Shtetëror për Parandalimin e Korrupsionit do të shqyrtojë se si janë harxhuar paratë e buxhetit jo vetëm në Kuvend, por në të gjitha institucionet e shtetit.

 

Si janë harxhuar paratë e parapara si kompensim për shpenzimet për udhëtim, si janë shfrytëzuar paratë e parapara për reprezentacion dhe si janë marrë vendimet për shfrytëzimin e automjeteve zyrtare? Do të shoshiten edhe vendimet për benificionet që u jepen zyrtarëve që jetojnë të ndarë nga familja, por edhe mënyra se si ish presidentët e republikës huazojnë ambiente me qira për të hapur zyrën e ish presidentit. Në shënjestër janë ish presidentët, Ivanov e Cërvenkovski.            

 

“Si bëhet zgjedhja e zyrave të tilla? A ka ose jo shërbimi për çështje të përgjithshme të ofrojë hapësira shtetërore? Nëse nuk ka, atëherë si bëhet zgjedhja e atyre hapësirave? Kjo vlen për të gjithë ish kryetarët”,- deklaroi kryetarja e KShPK-së, Biljana Ivanovska.

 

Procedurë për kundërvajtje për shumë zyrtarë të cilët nuk kanë dorëzuar fletën anketuese dhe atë të interesit, kryesisht dekanë fakultetesh. Padi për kundërvajtje edhe për drejtoreshën e Klinikës për Hematologji, Irina Panovska Stavridis. Në katër mandate nuk ka dorëzuar fletën anketuese për gjendjen pronësore.   

 

“Është emëruar katër herë, dhe sipas evidencës sonë, i bie që më 15 maj ka dorëzuar fletë-anketat për katër emërimet njëkohësisht. Kështu që konstatohet se nuk janë dorëzuar në afat dhe propozoj të ngrihet procedurë për kundërvajtje”,- theksoi anëtari i KShPK-së, Shemshi Sallai.

 

Në mungesë të kushteve teknike, Komisioni Shtetëror për parandalimin e Korrupsionit vazhdon të mbajë seancat vetëm në gjuhën maqedonase. Përgjegjësinë ia hedhin institucioneve përgjegjëse për zbatimin e ligjit.

 

“Hapni debat të trajtoni tema se deri ku ka arritur implementimi i Ligjit për gjuhët për arsye se ne kemi problem të sigurojmë përkthyes, të cilët në të ardhmen duhet të jenë të punësuar në kuadër të Sekretariatit të Komisionit për Pengimin e Korrupsionit”,- u shpreh anëtari i KShPK-së, Nuri Bajrami.

 

KShPK hapi procedura të reja edhe për furnizime publike të dyshimta, tendere dhe raste të dyshimta për korrupsion dhe nepotizëm në gjykata.