Ekzekutimi nga ISIS, nxit reagim ndërkombëtar

 

Pas lajmit të publikimit të videos së dytë, presidenti amerikan, Barack Obama, urdhëroi dërgimin e 350 trupave të tjerë në Bagdad, për të mbrojtur ambientet diplomatike amerikane.

 

Sotloff, gazetar 31 vjeçar, u rrëmbye në Siri në vitin 2013. Ai u shfaq në një tjetër video muajin e kaluar, ku ekstremistët e shtetit islamik treguan ekzekutimin me prerje koke të gazetarit amerikan, James Foleyt. Familja e tij njoftoi se kanë hapur dyert e mortit, por me një organizim privat. 

 

Një tjetër militant në videon e fundit kërcënoi gjithashtu se do të vrasin pengun e radhës, këtë herë britanik, duke e shfaqur edhe me pamje. Familja e pengut britanik ka kërkuar nga media që të mos bëhet publik emri i tij.

 

Shteti islamik ka pushtuar një pjesë të madhe të territorit në Irak e Siri, duke deklaruar krijimin e një kalifati të ri të drejtuar nga lideri Abu Bakr al-Bagdadi. 

 

SHBA-të kanë nisur një fushatë sulmesh ajrore, mbi 120 të tilla, gjatë muajit të kaluar, për të ndihmuar forcat kurde të ndalin avancimin e IS-it. E pritshme dhe tmerruese videoja e fundit, për ekspertët ka një domethënie të veçantë.

 

Ajo tregon se sulmet ajrore amerikane, që kanë frenuar disi përparimin e luftëtarëve të ISIS-it në Veri të Irakut, i kanë shkaktuar dëme reale Organizatës së Dhunshme, duke cenuar planet e saj për ta shtrirë me forcë sundimin e vet edhe në rajonin e Kurdistanit.

 

Të paaftë t’u përgjigjen avionëve të Amerikës, ISIS përgjigjet me një lloj informacioni frikues lufte, për të cilin e di mirë që do të tmerrojë njerëzit në Perëndim.

 

Së dyti edhe kërcënimi ndaj një pengu britanik po përkthehet si tregues i faktit që shteti islamik nuk bën dallim mes SHBA-ve dhe Britanisë në trajtimin e tyre si armiq edhe pse britanikët nuk kanë marrë pjesë në fushatën ajrore mbështetëse të Milicisë kurde.