Shkollat: probleme me transportin, Dehari kërkon ndihmë

Drejtuesit e shkollës së mesme “Drita”, vendosën mbrëmë që transporti i nxënësve nga vendbanimi i tyre e deri në shkollë dhe anasjelltas të bëhet me vetëfinancim nga ana e prindërve.

 

Kjo është një zgjidhje e përkohshme që do të realizohet vetëm gjatë muajit shtator, kur pritet të përfundojë procedura e tenderimit nga ana e Komunës. Ky vendim i është kumtuar edhe kreut të Kërçovës, Fatmir Deharit.

 

Dehari, ndërkohë kërkon ndihmë nga Pushteti Qendror për tejkalimin e kësaj situate. Sipas tij, keqqeverisja në të kaluarën e ka lënë Komunën me 1 milion e 600 mijë euro borxh dhe kjo shton vështirësitë në mbarëvajtjen e procesit mësimor.

 

Gjatë takimeve me të gjithë drejtorët e shkollave, Dehari kërkoi që të rritet sistemi i kontrollit, cilësia në arsim dhe bashkëpunimi konstruktiv për efikasitet dhe mbarëvajtje të procesit arsimor.