Qeveria dhe Ambasada e Zvicrës, projekt për zhvillim të barabartë rajonal

Rajoni i Shkupit dallon shumë në krahasim me rajonet tjera të Maqedonisë së Veriut sa i përket plotësimit të kushteve për jetesë. Andaj, përmes projektit “Zhvillim i barabartë inkluziv dhe i qëndrueshëm rajonal”, të mbështetur nga ana e Ambasadës së Zvicrës, tentohet rritje e zhvillimit të barabartë rajonal. Përmes këtij projekti rajonet planore do të fitojnë grande në bazë të dy komponentëve, asaj të infrastrukturës dhe projekteve inovative. 

 

“Ky projekt u jep mundësi të gjithë aktorëve, pa marrë parasysh se a janë ata qytetarë, komuniteti i biznesin apo qarqet akademike, të gjithë të marrin pjesë në këtë projekt. Mendoj se kjo është e rëndësishme që të decentralizohet marrja e vendimeve dhe t’i jepet mundësi të gjithëve që të marrin pjesë në këtë proces”,- tha zëvendësambasadori i Zvicrës në RMV, Stefan Tomaçan.

 

“Për zhvillim të barabartë rajonal po financohen rreth 1 milion e 740 mijë franga zvicerane nga ana e buxhetit apo shtetit dhe 3 milion e 680 mijë franga zvicerane nga ana e ambasadës zvicerane”,- theksoi zëvendëskryeministri për çështje ekonomike, Koço Angjushev.

 

I pyetur se a mundet që komunat t’i harxhojnë paratë në mënyrë jotransparente, ministri Fazliu mohon një gjë të tillë. 

 

“Ky projekt implementohet në mënyrë inkluzive, në secilin moment ndiqet nga Ambasada e Zvicrës dhe nga ana e kabinetit të zëvendëskryeministrit Angjushev, ashtu që nuk ka hapësirë as për keqpërdorime e as për shpenzime jotransparente të mjeteve”,- theksoi ministri i pushtetit lokal, Suhejl Fazliu.

 

Në bazë të projekteve infrastrukturore, rajonet planore do të fitojnë grande në bazë të principit rajoni më pak i zhvilluar do të fitojë më shumë para, kurse për më të zhvilluarin më pak. Në bazë të projekteve inovative secilit rajon planor do t’i ndahen nga 39 mijë franga zvicerane.