Pendarovski dekretoi ligjet nga fusha e sigurisë

Kreu i shtetit, Stevo Pendarovski, ka dekretuar ligjet për koordinim të komunitetit kundërzbulues dhe Ligjin për Agjencinë e Sigurisë Nacionale për shpalljen e tyre në Gazetën Zyrtare.

 

Ligjet të cilat u votuan javën e kaluar në Kuvend janë tepër të rëndësishme për realizimin e reformave në shërbimet e inteligjencës, që njëherit ishin pjesë e rekomandimeve të PRIBE-së.

 

Me Ligjin për koordinim të komunitetit kundërzbulues, tani më formohet Këshilli i posaçëm për  koordinim, i cili do t’i zbatojë propozimet e trupit më të lartë të sigurisë - Këshillit për Siguri Nacionale.

 

Në Këshillin për koordinim do të përfaqësohen të gjitha institucionet që kanë kompetenca në fushën e mbrojtjes dhe sigurisë, ndërsa me Ligjin për Agjencinë e Sigurisë Nacionale në mënyrë precize rregullohet grumbullimi i të dhënave dhe informatave të rëndësishme për sigurinë dhe mbrojtjen e shtetit.