Komisioni i Mandatit dhe Imunitetit debaton për marrjen e mandatit të Gruevskit

Deputetët do të vendosin për propozimin për shkak të mungesës së paarsyeshme të Gruevskit më shumë se gjashtë muajt, ndërsa në bazë të njoftimit nga kryetari i Kuvendit të Republikës së Maqedonisë së Veriut, Talat Xhaferi, të dorëzuar më 15 maj të vitit 2019. 

 

Seanca për marrjen e mandatit të Gruevskit filloi javën e kaluar, por nuk përfundoi për shkak të dorëheqjes së deputetit dhe kryetar të komisionit, Pavle Bogoevski. Sipas nenit 59 nga Rregullorja kuvendore, për deputetin i cili pa arsye ka munguar nga seancat e Kuvendit më shumë se gjashtë muaj, kryetari i Kuvendit e ka njoftuar Komisionin për Çështje të Rregullores, Mandatit dhe Imunitetit.

 

Propozim për marrjen e mandatit të deputetit në këtë rast, parashtron Komisioni për Çështje të Rregullores, Mandatit dhe Imunitetit, në afat prej 15 ditëve nga dita e marrjes së njoftimit nga kryetari i Kuvendit, ndërsa në propozimin e tij për marrjen e mandatit të deputetit, Kuvendi zhvillon debat në seancën e parë të ardhshme. Për marrjen e mandatit është e nevojshme që propozimin ta mbështesin dy të tretat e deputetëve ose 80 vota “për”.