N. P.“Higjiena Komunale” gëzon të punësuarit: Do të paguhet regresi për pushimin vjetor për 3 vite

Ndërmarrja Publike “Higjiena komunale” deri në fund të vitit të punësuarve të saj do t’ua paguajë regresin për shfrytëzim të pushimit vjetor për 3 vitet e kaluara.

 

Marrëveshja për mënyrën e kryerjes së kësaj pagese u nënshkrua mes kryetarit të Ndërmarrjes Publike “Higjiena Komunale”, Abdusamed Shabani, dhe kryetarit të Sindikatës së punëtorëve, Darko Dimovski.

 

“Që nga dita e parë e kemi thënë publikisht që do të kujdesemi për të drejtat e punëtorëve tanë, por edhe për përmirësimin e kushteve. Dua të shpreh kënaqësinë time nga vendimi i marrë, duke pasur parasysh se ndaj punëtorëve të Ndërmarrjes më shumë se një dekadë nuk u është përmbushur kjo detyrë ligjore. Shpresoj që kjo nuk do të jetë hera e parë por as e fundit”,- deklaroi drejtori i Ndërmarrjes Publike “Higjiena Komunale”, Abdusamed Shabani.

 

“Nuk është e lehtë të negociohet me punëdhënësit për detyrimet që kanë ndaj të punësuarve, ja siç është rasti me rikthimin e regresit, por sigurisht që nuk është e lehtë as për drejtorin që të ndajë 14 milion denarë pas 11 vitesh kur dikush nuk e ka bërë atë në kohë”,- tha kryetari i Sindikatës, Darko Dimovski.

 

Të punësuarve në “Higjienën Komunale” do t’u paguhet regresi për shfrytëzim të pushimit vjetor për vitin 2016, 2017 dhe 2018, ndërsa vendimi në fjalë i Këshilli drejtues të ndërmarrjes vjen pas situatës stabile financiare që ka pasur gjatë vitit të kaluar.