Filloi Samiti i Poznjanit, Han: BE të vlerësojë rekomandimin e KE-së për Maqedoninë e Veriut

Me pjesëmarrje të kancelares gjermane, Angela Merkel, kryeministres së Britanisë së Madhe, Francës, eurokomisarit për zgjerim, Johanes Hahn, dhe politikanëve evropianë dhe ballkanas, filloi Samiti i procesit të Berlinit për përkrahjen e procesit eurointegrues dhe bashkëpunimit rajonal për Ballkanin Perëndimor, që po mbahet në Poznjan të Polonisë.

Eurokomisioneri për zgjerim, Johanes Hahn, në fjalimin e tij në forumin për tregti dhe industri, mes tjerash i është referuar edhe çështjes së hapjes së negociatave. Han pret që në tetor BE të ketë parasysh vlerësimin e KE-së për Maqedoninë e Veriut dhe Shqipërinë.

“Fuqishëm qëndroj pas rekomandimeve të KE-së për hapjen e bisedimeve me Maqedoninë e Veriut dhe Shqipërinë. Vlerësoj që Samiti i tetorit të ketë parasysh vlerësimin tonë pozitiv. Të dyja shtetet kanë realizuar reforma, në veçanti në fushat e përmendura në rekomandimet e vitit 2018. Ne si BE e kemi patjetër të respektojmë obligimet që i kemi dhënë”,- tha eurokomesioneri për zgjerim, Johanes Hahn.

Ballkani ka nevojë për investime, ka shtuar Hahn, që, sipas tij, kjo siguron stabilitet dhe shoqëri demokratike.

ÇAPUTOVIQ: EVROPA NUK ËSHTË E PLOTË PA BALLKANIN PERËNDIMOR

Ndërkohë, ministri i jashtëm polak, Çaputoviq, ka potencuar se Evropa nuk është e plotë pa Ballkanin Perëndimor.

“Evropa nuk mund të llogarisë se është e plotë pa Ballkanin Perëndimor, për shkak të  aspektit gjeografik dhe atë të politikës”,- theksoi ministri i punëve të jashtme në Poloni, Jasek Çaputoviq.

Samiti në ditën e parë shtjellon çështjet ekonomike, ndërsa në ditën e dytë procesin eurointegrues. Në formatin ministror temë e diskutimeve janë:  bashkëpunimi në fushën e transportit dhe energjetikës në rajon, integrimit  ekonomik, sfidat e sigurisë dhe migrancioni.

Kryeministri, Zoran Zaev, zëvendëskryeministrat, Bujar Osmani dhe Koco Angjushev, ministri i jashtëm Dimitrov dhe ministri i Ekonomisë, Bekteshi, përbëjnë delegacionin e shtetin në samit.

Kancelarja Merkel, kryeministri i Bullgarisë, Bojko Borisov, ai i Rumanisë, Mateush Moravjecki, dhe kryeministri i shtetit, Zoran Zaev, do të mbajnë pres konferencë ku do të kumtojnë zyrtarisht se me Samitin e procesit të Berlinit do  udhëheqin së bashku, Bullgaria dhe Maqedonia e Veriut në 12 muajt e ardhshëm (Nermin Mulaki Fejzullahu, TVM2)