Arsimi profesional, tre qendra rajonale për rikualifikim e trajnim

Në shërbim të nxënësve dhe qytetarëve për kualifikim dhe rikualifikim parashihen të hapen tre qendra rajonale për arsim profesional dhe për trajnim në rajonin e Pollogut, rajonin verilindor dhe atë perëndimor. MASh intensivisht po punon në promovimin e beneficioneve të arsimimit profesional, vlerësoi ministri i Arsimit, Arbër Ademi. Funksionimi i qendrave do të sigurohet nga  mjetet e fondeve IPA 2 dhe së shpejti pritet që qendrat të funksionojnë.

 

“Hapja, themelimi dhe funksionimi i vetë qendrave është me mjetet nga  IPA2 dhe të gjitha aktivitetet që janë në kuadër të programit 2017, do të ndërmerren me buxhetin e paraparë për fillimin e procedurave dhe së shpejti të njëjtat do të vendosen”,- tha ministri i Arsimit, Arbër Ademi.

 

 

Ministri Ademi po ashtu theksoi se nuk është i interesuar për reforma makijazhi, por për reforma esenciale. Në draft ligjet që janë në debat publik, sipas tij, veç më janë inkorporuar të gjitha rekomandimet e OECD-së dhe UNICEF-it për përmirësimin e gjendjes në arsim. Me delegacionin nga BE dhe Komisionin Evropian po punohet intensivisht edhe për gjetjen e mundësive për një arsimim në përputhje me nevojat e tregut të punës.

 

“Këto qendra rajonale paraqesin mundësi për të përmirësuar cilësinë në shkollimin e mesëm profesional dhe po ashtu parashihet që të njëjtat do të ndikojnë që punëdhënësve t’u sigurohet cilësi më e madhe nga kuadrot e diplomuar dhe bashkëpunimi i vet qendrave rajonale nga tërë rajonet parashihet të përmirësojë nevojat e industrisë”,- tha Xhulian Stenli nga ETF.

 

Sa i përket letrës publike të inspektorit Ilievski, ku akuzon pikërisht  ministrin Ademi që të mos dorëzohen vërejtjet nga mbikëqyrja inspektorale në Universitetin e  Tetovës, Ademi i inkurajon të gjitha institucionet të respektojnë rregullat ligjore.