Dorëhiqet kryeprokurorja speciale, Janeva. “S’jam unë alibi për të mbajtur peng PSP-në”

Kryeprokurorja speciale, Katica Janeva, dha dorëheqje të parevokueshme nga PSP. Dorëheqja, siç thekson Janeva në komunikatën me shkrim të publikuar në ueb faqen zyrtare të PSP-së do të aktivohet në momentin kur partitë politike të harmonizojnë vendimin ligjor dhe do të zgjedhin personin që do zërë vendin e saj.

Janeva sqaron se nuk do të lejojë askënd të shfrytëzojë emrin e saj si alibi për të mbajtur peng fatin e Speciales, madje edhe të vetë ardhmërisë europiane të vendit. Për këtë vendosi të japë dorëheqje të parevokueshme.

“Me muaj i ndjek kronikat në media rreth negociatave të grupeve të punës së partive politike për të ardhmen e PSP-së. Ja sot e shfrytëzoj rastin të informoj opinionin se unë nuk do të lejoj që emri im të përdoret për ndonjë alibi që të mbahet peng fati i PSP-së dhe i integrimeve evropiane të vendin tim. E deponoj dorëheqjen time, e cila do të aktivizohet atëherë kur partitë politike do të merren vesh për ligjin e ri, me të cilin dhe do ta zgjedhin pasardhësin tim. Më lejoni që publikisht të falënderoj të gjithë ekipin e Prokurorisë Speciale Publike me të cilët kemi shkruar historinë. Duhet të jemi krenarë, sepse ne jemi simbol i luftës pa kompromis kundër formave më të larta të krimit dhe kriminalitetit të organizuar”,- shkruan Janeva në letrën e saj të dorëheqjes, duke falënderuar njëkohësisht edhe qytetarët dhe mediat që i dhanë përkrahje të parezervë PSP-së. (Flutura Latifi, TVM2)