OEM: Luftë korrupsionit për ekonomi të fuqishme, Pendarovski: Asnjë ligj pa konsultë me komunitetin e biznesit

Odat Ekonomike kërkojnë luftë pa kompromis kundër korrupsionit  dhe ekonomisë së zezë. Në takimin me presidentin, OEM kërkon që kreu i shtetit të ndikojë në stabilitetin politik të vendit, që është garanci për investuesit e për zhvillim ekonomik.

“Për ne është shumë e rëndësishme të kemi stabilitet, qetësi, kushte të mira, që të mundemi jo vetëm të punojmë, por edhe të jetojmë në Maqedoni, dhe këtë e shohim nga aktivitet e presidentit dhe shpresojmë që kjo do të vazhdojë edhe në të ardhmen, pra të zvogëlohet polarizimi në shoqëri dhe të jetë ai i cili do t’i vë në masë faktorët politikë dhe përmes presidentit të arrihet konsensusi  politik”,- deklaroi Daniella Arsovska nga Lidhja e Odave Ekonomike e Maqedonisë.

Nga presidenti u kërkua edhe angazhim për diplomaci ekonomike, pra për dërgimin e profesionistëve të fushës në ambasadat e Maqedonisë së Veriut, që do t’i avanconin interesat e kompanive vendase në tregun botëror. Presidenti premtoi se asnjë ligj nuk do të nënshkruhet pa miratimin e komunitetit të biznesit.

“Nuk do të nënshkruhet asnjë ligj apo dekret për shpalljen e një ligji nga ana ime nëse komuniteti i biznesit mendon se është në kundërshtim me interesat e tyre ose kundër interesave të qytetarëve. Nëse bëhet një lloj komploti i tillë burokratik dhe nuk ka lidhje me ekonominë reale dhe ju çuditeni se si ta zbatoni atë në praktikë, unë do ta kthej atë. Do të kërkoj rivotimin e tij me një shpjegim të detajuar pse nuk e kam nënshkruar dekretin”,- theksoi presidenti, Stevo Pendarovski.

Sa i përket kërkesës së OEM-së për më shumë ndihmë për bizneset, kreu i shtetit pranoi se aktualisht në shumë ambasada e shërbime konsullore mungon personeli por megjithatë premtoi përforcimin e diplomacisë ekonomike. (Zekirja Mexhiti, TVM2)