30 ditë paraburgim për Tomorr Morinën

Ndaj tij tashmë është vendosur masa e paraburgimit 30 ditor në bazë të nenit 165, pika e parë e Kodit të Procedurës Penale. Morina kërkohej me  fletëarrest nga Interpoli serb si i dyshuar për krime kundër serbëve në vitin 1999. Arrestimi i Morinës shkaktoi tensione në seancën e fundit për pyetje deputetësh.

 

Deputeti i BDI-së, Ejup Halimi, përkujtoi se Morina është  qytetar i  Kosovës me pasaportë britanike e fletëarresti i Serbisë nuk ka qenë valid për asnjë nga vendet europiane përmes të cilave ai ka kaluar. Halimi i kërkoi qeverisë të ndërhyjë dhe përkujtoi se dhe në kuvend aktualisht ka deputetë që janë në listën serbe nga koha e  Millosheviqit.

 

“Kemi dhënë betim, edhe sakrifica kemi bërë që të respektojmë ligjin e së drejtës dhe normat ndërkombëtare, kemi sakrifikuar nga vetvetja që vetëm e vetëm vendi të integrohet në strukturat euroatlantike. Dhe tash cilat janë rezultatet nga puna jonë të arrestojmë me kërkesa të Millosheviçit? Ka në këtë kuvend shumë në listën e Millosheviçit”,- theksoi deputeti i BDI-së, Ejup Halimi.

 

Por, kryeministri Zaev thotë se vendimet gjyqësore i merr gjyqësori dhe politika nuk ka pse të përzihet në punën e prokurorisë.  

 

“Procedura kryhet nga prokurori kompetent dhe për këtë vendos gjykatësi kompetent, as Zaev, as Oliver Spasovski, as Agim Nuhiu dhe askush tjetër nga qeveria”,- u shpreh kryeministri, Zoran Zaev.

 

Edhe Ministria e Jashtme e Kosovës ka kërkuar lirimin e Morinës.