Meksikë, identifikohen kufomat e gjetura në varrin masiv

Policia shkencore në Meksikë ka arritur të identifikojë 44 trupa të pajetë të varrosur në një gropë masive në shtetin e Jaliskos.

Trupat u gjetën në fillim të shtatorit në rrethinat e qytetit Guadalahara, pas denoncimit të banorëve për shkak të erës së rëndë. Ata ishin vendosur në 119 thasë të zinj.

Shumica e trupave ishin të prerë dhe agjentëve të policisë shkencore iu desh të bashkonin pjesë të ndryshme për t’i identifikuar. 

Jalisko është një nga territoret më të prekura nga lufta e bandave të drogës dhe zbulimi në fjalë ishte i dyti brenda vitit.

Një organizatë lokale për kërkimin e personave të zhdukur i ka bërë apel qeverisë që të dërgojë më shumë specialistë për të ndihmuar në procesin e identifikimit.