Deklarimet e Verusheskit, Gruevski në FB: Shpërtheu “bomba”, pushtetin e morën me montime

Ish kryeministri, Nikolla Gruevski, përsëri është deklaruar përmes rrjetit social Facebook lidhur me përgjimet, një status që merr shkas dëshminë e ish kundërzbuluesit, Zoran Verusheski, në lëndën “Target – Fortesa”, se “bombat” e opozitës kanë pësuar modifikime para se të publikoheshin.

“Ngadalë por sigurt, e vërteta po del në shesh. Kur u publikuan përgjimet në vitin 2015, theksuam se nuk janë të vërteta dhe të plota dhe se ishin bërë intervenime. Mediat, gazetarët, analistët dhe gjithë ata që na urrenin, u bënë bashkë me LSDM-në dhe nisën talljen me frazën “të ngjitura e të montuara””,- shkruan mes tjerash ish kryeministri azilant.

Ish kundërzbuluesi Verushevski, në dëshminë e tij tha se materialet e përgjuara janë dërguar në LSDM që në 2010, kur në krye të partitë ishte Branko Cërvenkovski dhe pasardhësi i tij, Zaev, vendosi t’i bëjë publike 5 vjet më vonë.

Ish presidenti Cërvenkovski nuk ka dashur të komentojë këto deklarime.