18 kompani fituese të çmimit për praktika më të mira shoqërore

Trupi Koordinativ për Përgjegjësi Shoqërore të Ndërmarrjeve dhe Konfederata e Bizneseve në Maqedoni, në bashkëpunim me Ministrinë e Ekonomisë, sot publikuan emrat e tyre.

Edhe këtë vit, “EVN Maqedoni” është shpërblyer për mbështetjen e zhvillimit profesional të të rinjve me bursa dhe punë praktike në kompaninë e saj, si dhe për ngritjen e vetëdijes te popullata për efikasitetin energjetik.

Çmim për përgjegjësi shoqërore morën edhe Fabrika “Makstil”,  “Shparkasse Bank”, “Remedika”, “NLB Tutunska Banka”, “Tikvesh”, “Feni” e të tjerë. Ata shprehen se do të vazhdojnë me kontributin e tyre për përgjegjësi shoqërore.

“Kjo është një kulturë korporative dhe jemi të kënaqur që kjo gjë vlerësohet këtu në Maqedoni. Këto dy çmime, në veçanti ajo për efikasitet energjetik, që u realizua në bashkëpunim me Ministrinë e Ekonomisë, ishte shumë i suksesshëm dhe jemi shumë të lumtur që i njëjti u shpërblye”- deklaroi kryetari i Këshillit Drejtues i “EVN-Maqedoni”, Verner Henks.

“Këtë vit aplikuam në projektin transparencë dhe udhëheqje etike, të cilin e kemi filluar nga viti 2012-të. Menduam se mjedisit ka nevojë t’i shpjegohet procesi i prodhimit në “Feni” dhe hap pas hapi e zhvilluam projektin”- tha Viktor Trajkov nga “Feni”.

“Padyshim se këtë shpërblim do ta shfrytëzojmë për promovim dhe zhvillimin e mëtejmë edhe të strategjisë sonë në treg”- theksoi Elena Mladenovska-Elenkoviq nga “Tikvesh”.

Ky shembull tregon se koncepti i përgjegjësisë shoqërore nga viti në vit po bëhet pjesë përbërëse e politikës te subjektet afariste në vend sipas shembullit evropian, tha ministri i Ekonomisë.

“Në këtë mënyrë, drejtpërdrejtë përmirësojmë konkurrencën e tyre në ekonominë globale, rrisim vlerën e shtuar të prodhimeve dhe shërbimeve të tyre, përmirësojmë imazhin dhe reputacionin dhe imazhin e ndërmarrjeve, marrëdhëniet me furnitorët, konsumatorët dhe investuesit potencial”- tha ministri i Ekonomisë, Bekim Neziri.

Ky çmim i ndahet tradicionalisht kompanive që kanë dhënë kontribut në shoqëri. Këtë vit, çmimi kombëtar është pjesë e një iniciative të mbështetur nga Komisioni Evropian i quajtur “Përgjegjësia shoqërore për të gjithë”. (Naim Ramadani, TVM2)