Beograd, Erdogan pritet nga presidenti serb, Vuçiq

Me këtë rast Erdogan ka njoftuar se Turqia do të hapë një konsullatë të përgjithshme në Novi Pazar.

Në konferencën e përbashkët për media me homologun e tij serb, Aleksandar Vuçiç, pas bashkë-kryesimit të një takimi të nivelit të lartë të Këshillit të Bashkëpunimit Turqi-Serbi në Beograd, presidenti Erdoğan tha se, “Sot, ne po ndërmarrim një hap tjetër historik në kontekstin e marrëdhënieve tona dypalëshe. Serbia iu përgjigj pozitivisht kërkesës së Turqisë për hapjen e një konsullate të përgjithshme në Novi Pazar”.

Erdoğan tha se takimi i tij me Vuçiçin ishte “shumë i frytshëm” dhe udhëheqësit e të dy vendeve vendosën “qëllime të reja” në marrëdhëniet e tyre dypalëshe. 

Presidenti turk po ashtu tha se marrëdhëniet dypalëshe midis Turqisë dhe Serbisë kanë arritur në një nivel “perfekt”. Para vizitës në Serbi, Erdogan ka thënë se arritja e një marrëveshje për çështjen e Kosovës, e cila kënaq të gjithë palët e interesuara, është jetike për të arritur stabilitetin dhe paqen afatgjatë në Ballkan.