Grenell në Prishtinë, i dërguari i Trumpit takon liderët e Kosovës

Tri ditë pas përfundimit të zgjedhjeve parlamentare, në Kosovë ka arritur për vizitë Richard Grenell, përfaqësues special i presidentit amerikan, Donald Trump, për të diskutuar rreth dialogut Kosovë - Serbi. Ai fillimisht ka takuar presidentin e Kosovës, Hashim Thaçi, por deklarata për mediat pas takimit nuk kishte.

 

Përmes një kumtese kabineti presidencial njoftoi se në takim u tha që Marrëveshja e Paqes në mes Kosovës dhe Serbisë do t’i kontribuonte zhvillimit të Kosovës dhe tërë rajonit. Presidenti Thaçi ka thënë se Kosova do të jetë konstruktive në gjetjen e një zgjedhjeje e cila do t’i hapë rrugë zhvillimit, ndërsa ka shtuar se “pjesëmarrja aktive e SHBA-së në gjetjen e një zgjidhjeje përfundimtare ndërmjet Kosovës dhe Serbisë do të jetë përcaktuese”.

 

Grenell ka takuar edhe fituesin e zgjedhjeve parlamentare, pretendentin për kryeministër Albin Kurti dhe liderët e partive tjera në Kosovë, të cilëve po ashtu u ka shpalosur qëndrimin amerikan për dialogun mes Kosovës dhe Serbisë. Përveç emisarit të presidentit amerikan për dialogun Kosovë-Serbi, Richard Grenell, Kosovën pritet ta vizitojë edhe përfaqësuesi special për Ballkanin dhe për dialogun të cilin e kishte emëruar sekretari amerikan Mike Pompeo, Matthew Palmer.