Bie qeveria në Rumani, Dancila nuk i mbijetoi mocionit të mosbesimit

238 deputetë të dhomës së ulët dhe senatorë, pesë më shumë nga sa nevojitej, mbështetën mocionin e paraqitur nga 6 parti opozitare. Tani një qeveri kalimtare pritet të marrë përsipër drejtimin e vendit deri në zgjedhjet e ardhshme të 2020. Ligjvënësit e akuzuan shefen e ekzekutivit, Viorica Dancila, për paaftësi dhe shpërdorim të fondeve të BE-së. 

 

“Përfundoi makthi në të cilin Rumania jetonte tashmë prej tre vjetësh. Parlamenti shkarkoi qeverinë që e ka turpëruar Rumaninë si askush tjetër në 30 vitet e kaluara”,- deklaroi kryetari i Partisë Nacionale, Ludovic Orban.

 

“Mesazhi që dha Parlamenti  ishte konfirmimi se PSD ishte kthyer në një histori të trishtuar të politikës rumune. Tashmë u hapën rrugët për zgjedhje të parakohshme”,- u shpreh Dan Barna nga USHR.

 

“Znj. Dancilla nuk ishte e denjë për postin e kryeministres dhe kryetares së PDS-së. Është një gjë e mirë kjo që ndodhi sot”,- u shpreh kryetari i Pro-Romania, Victor Ponta.

 

Kryeministrja Dancila tha se qeveria ka realizuar shumicën e planprograt të saj dhe u ndje e tradhtuar nga vota kundër ekzekutivit edhe nga partnerët.

 

“Siç e shihni, mocioni i mosbesimit u votua. Të gjitha partitë u bashkuan për të votuar kundër qeverisë, na tradhtuan edhe kolegët e partisë socialdemokrate. Nuk ka problem. Ne po largohemi pasi kemi realizuar detyrat tona, kemi menaxhuar shumicën e objektivave nga programi ynë qeverisës dhe qytetarët e kanë ndjerë këtë”,- tha kryeministrja e Rumanisë, Viorica Dancila.

 

Zgjedhjet e përgjithshme të parakohshme nuk janë një opsion për momentin, pasi vendi muajin e ardhshëm përballet me zgjedhjet presidenciale. Sipas ligjit, Rumania nuk mund të mbajë zgjedhje parlamentare përveçse me një diferencë 6 mujore prej atyre presidenciale. Opozita tani ka 10 ditë në dispozicion, për të emëruar një kryeministër të ri, të cilit do t`i nevojitet aprovimi i presidentit, Klaus Iohannis.

 

“Sot fitoi Rumania. Vota ishte rezultat natyror i reagimit shoqëror ndaj abuzimeve dhe paaftësisë së kësaj qeverie. Do të dëgjoj propozimet e partive e do të propozoj një zgjedhje për ekzekutivin me një mandat të pastër që do të na sigurojë qeveri efikase deri në zgjedhjet e ardhshme, pavarësisht se kur do të mbahen”,- u shpreh presidenti i Rumanisë, Klaus Iohannis.

 

Rrëzimi i qeverisë pasoi humbjet shokuese të socialdemokrateve në pushtet në zgjedhjet europiane të muajit maj si dhe dënimin me burg të liderit të fuqishëm të saj, Liviu Dragnea, të cilin e fundosën akuzat për korrupsion.