Rasti “Zhvatja”, Janeva ende bën analiza në spital

Mjekët ende po kryejnë analiza për të vërtetuar gjendjen shëndetësore të ish kryeprokurores, e cila edhe më herë është ankuar nga tensioni i lartë, por ishte kuruar në kushtet e klinikës së burgut. Një ditë më parë u njoftua se ish kryeprokurorja është në gjendje të dyshuar para-infarkt dhe është shtruar për kontrolle të mëtejshme në një klinikë private. Sipas ligjit, shpenzimet për trajtimin e të arrestuarve në klinika private përballohen nga personi i dyshuar ose i akuzuar.

 

Avokatët e Janevës thonë se sërish do kërkojnë masën e arrestit shtëpiak për shkak të gjendjes së rënduar shëndetësore të saj. Por, për këtë fillimisht do të duhet të presin javën e ardhshme kur pritet edhe përgjigja nga Gjykata rreth garancisë së ofruar për lëshimin e Janevës nga paraburgimi në Shutkë, garanci kjo që më herët është refuzuar.