Osmani: Vendimi për RMV-në, inkurajim për rajonin

Zëvendëskryeministri për Çështje Evropiane, Bujar Osmani, nga Italia ku po qëndron në një vizitë pune, tha se takimi i Këshillit të BE-së javën e ardhshme është me rëndësi thelbësore për RMV-në, si vend i cili i plotëson të gjitha parakushtet dhe obligimet e sugjeruara. Sipas Osmanit, vendi me meritë pret fillimin e negociatave me BE-në këtë vit. Gjatë takimit me homologun e tij italian, Vinçenco Amendola, Osmani potencoi se fillimi i negociatave aderuese do të ishte inkurajim edhe për gjithë rajonin në realizimin e perspektivave evropiane.

 

“Pa mirënjohje përkatëse për progresin e Maqedonisë së Veriut, jo vetëm që do të rrënohet kredibiliteti i BE-së në rajon, por në përgjithësi do të rrezikohet rrjedha e mëtejme e procesit për zgjerim dhe do të humbet fuqia pozitive transformuese e perspektivës evropiane”,- theksoi Osmani.

 

Ai shprehu mirënjohje për mbështetjen e deritanishme të Italisë dhe mori bindje të fuqishme nga ana e ministrit Amendola se Italia mbetet e përkushtuar në integrimet evropiane të gjithë rajonit të Ballkanit Perëndimor, me mbështetje të fuqishme për fillim të negociatave me Republikën e Maqedonisë së Veriut në prag të Samitit të BE-së javën e ardhshme.