Kumanovë, përurohet Salla e sporteve në Çerkez

Në kuadër të projektit të Ministrisë për Arsim dhe Shkencë “145 salla sportive”, në fshatin Çerkez të Kumanovës, në një sipërfaqe prej 650 m2, u përurua Salla e sporteve pranë Shkollës fillore “Jeronim De Rada”. Ndërtimi i këtij objekti sportiv kapital arrin shumën prej 24 milionë denarëve, mjete këto të siguruara nga Buxheti i Republikës së Maqedonisë së Veriut dhe kredia nga Banka për Zhvillim e Këshillit të Evropës.

 

“Investimet e bëra deri më tani kapin vlerën deri në 30 milion denarë gjatë këtyre 2 viteve në përmirësimin e kushteve, ndërtimin e sallës sportive, ndërrimin e çatisë së shkollës dhe projekte tjera në vazhdim, siç është izolimi dhe fasadimi i objektit shkollor, me ndihmën e gjithë ju shkolla jonë mori pamjen e një shkolle bashkëkohore”,- theksoi drejtor i Sh. F. “Jeronim De Rada” – Çerkez, Hakik Jahiu.

 

“Në kuadër të këtij kabineti qeveritar je duke bërë punë të mira në përmirësimin e cilësisë në arsim, duke bërë reforma thelbësore, duke sjellë ligje moderne të cilat u japin mundësi nxënësve tanë të jenë kompetitiv në tregun global, jemi duke përmirësuar kushtet infrastrukturore në Kumanovë e Likovë, e çdokund tjetër, sepse vetëm kështu hapërojmë përpara”,- tha ministri i Arsimit, Arbër Ademi.

 

“Pjesëmarrja e komunës në këtë projekt mbase është modest, por për ne i rëndësishëm, sepse ne në Kumanovë i përmirësuam kushtet e punës ku mësojnë fëmijët tanë”,- theksoi kreu i komunës së Kumanovës, Maksim Dimitrievski.

 

“Ky është prioritet i duhur për njerëzit e kësaj zone, por edhe ata kudoqofshin, vende këto ku fëmijët do të rriten në kushte për shëndetin psiko-fizik dhe do të mundësohet zhvillim i duhur i tyre që në moshën rinore dhe prandaj kujtoj se projekte të këtilla arsyetojnë punën tonë në politikë”,- u shpreh zëvendëskryeministri në Qeverinë e RVM-së, Bujar Osmani.

 

Salla e sporteve në këtë shkollë të fshatit Çerkez është e një rëndësie të madhe jo vetëm për mbajtjen e orëve të edukatës fizike, por edhe për zhvillimin e disiplinave të ndryshme sportive.