Shtëpia e Bardhë, javën e ardhëshme Trump takon Stoltenberg

Presidenti i Shteteve të Bashkuara, Donald Trump javën e ardhshme do të takohet me Sekretarin e Përgjithshëm të NATO-s, Jens Stoltenberg për të diskutuar për shpenzimet ushtarake.

 

Ky takim vjen në kohën kur presidenti amerikan po vazhdon përpjekjet e tij që të shtyjë vendet anëtare të Aleancës që të paguajnë më shumë për mbrojtjen e tyre. Shtëpia e Bardhë njoftoi se takimi do të zhvillohet më 14 nëntor ndërsa dop të bisedohet për “progresin e aleatëve të NATO-s në rritjen e shpenzimeve të mbrojtjes që të sigurohet ndarje e barabartë e barrës” së shpenzimeve.

 

Takimi Trump-Stoltenberg vjen para mbajtjes së samitit të NATO-s që është paraparë të realizohet më 3 dhe 4 dhjetor në Londër. Ky takim vjen një javë pasi presidenti i Francës, Emmauel Macron, gjatë një interviste për The Economist, paralajmëroi shtetet evropiane se NATO po vdes për shkak se Uashingtoni është i paparashikueshëm nën drejtimin e Trumpit, qëndrim që u kundërshtua nga Gjermania, por u lavdërua nga Rusia.

 

Gjatë qëndrimit në Uashington, Stoltenberg do të takohet edhe me Sekretarin amerikan të Shtetit, Mike Pompeo dhe me anëtarë të Kongresit. Ai po ashtu do të marrë pjesë në takimin e koalicionit botërorë kundër grupit militant, Shteti Islamik.