Vendkalimi kufitar Bellanoc-Stançiç, ASh me ultimatum: Kufiri të hapet deri më 28 nëntor

Aleanca për Shqiptarët me ultimatum deri te qeveria që të hapë deri më 28 nëntor vendkalimin kufitar Bellanoc-Stançiç, që lidh Maqedoninë e Veriut me Kosovën. Në të kundërtën, ASh thotë se do të organizojë një marsh protestues.

ASh akuzon BDI-në se po gënjen edhe për pikëkalimin kufitar Llojan-Miratoc, që lidh Republikën e Maqedonisë së Veriut me Serbinë.

“Ky është një premtim që BDI e ka dhënë që nga viti 2011, banorët e këtij rajoni pesë herë radhazi kanë dhënë votën për këtë projekt dhe ende nuk po gjen dritë ky projekt tejet i rëndësishëm për këta banorë. Aleanca për Shqiptarët, sot, nga ky vend, i bënë thirrje qeverisë dhe institucioneve kompetente që nëse deri më 28 nëntor nuk hapet vendkalimi kufitar Bellanoc-Stançiç, atëherë ne do ta organizojmë një marsh protestues të quajtur “Marshi Bellanoc-Stançiç””,- deklaroi Shefik Duraku nga Aleanca për Shqiptarët.

Nga ajo që regjistroi kamera e TVM2, shihet se aktivitetet për rrumbullakimin e punimeve janë në përfundim e sipër. Nga qeveria në më shumë raste kanë premtuar se hapja zyrtare e këtij vendkalimi kufitar do të bëhet shumë shpejt. (Fatlum Aqifi, TVM2)