Siri, 10 të vrarë dhe 25 të plagosur nga një shpërthim

Të paktën dhjetë persona janë vrarë dhe 25 të tjerë janë plagosur, pas shpërthimit të një makine-bombë, në qytetin kufitar sirian, që muajin e kaluar u mor nën kontroll nga forcat që mbështeten nga Turqia.

Shpërthimi ndodhi në një prej rrugëve kryesore të qytetit Tel Abyad, që është një prej dy qyteteve kufitare, ku ka pasur luftime të ashpëra që prej se Ankaraja nisi ofensivën më 9 tetor, e që kishte për cak forcat kurde që gjendeshin në verilindje të Sirisë.

Vëzhguesi Sirian për të Drejtat e Njeriut, organizatë me bazë në Londër, tha se katër civilë nga e njëjta familje janë në mesin e viktimave nga ky shpërthim, për të cilin, një Këshill lokal fajësoi YPG-në dhe PKK-në.

Ministria e Mbrojtjes së Turqisë po ashtu fajësoi YPG-në për këtë shpërthim, ku tha se janë vrarë tre persona dhe janë plagosur 20 të tjerë, ndërkaq, një zëdhënës i Forcave Demokratike Siriane që udhëhiqen nga kurdët, fajësoi siç u tha “mercenarët e mbështetur nga Turqia” për këtë shpërthim.