Bashkëpunim kadastral Maqedoni-Nikaragua

Agjencia për Kadastër të Patundshmërive do të këmbejë përvoja me Kadastrën nga Nikaragua, në kuadër të projektit për reforma në politikat e tokës, që po zbatohet në bashkëpunim me Bankën Botërore.

 

Për këtë qëllim, një delegacion nga Banka Botërore dhe nga Kadastra e Nikaraguas vizituan Kadastrën e Maqedonisë.

 

“Bashkëpunimi bazohet në projektin themelor të filluar në vitin 2005, për regjistrim të pronës së patundshme dhe vendosjen e Kadastrës së Patundshmërive. Projekti në vitin 2010, u shpall si më i miri i Bankës Botërore dhe vazhdon me emrin e njëjtë deri në qershor të vitit 2015, me aktivitete bartëse për digjitalizimin e planeve kadastrale”- deklaroi drejtori i Agjencisë së Kadastrës së Maqedonisë, Sllavçe Trpevski.

 

Herman Estrada, drejtor i Kadastrës së Nikaraguas, theksoi se nga Banka Botërore u janë transmetuar përvoja për projektin në Maqedoni. 

 

“Kemi dëgjuar shumë gjëra të bukura për Maqedoninë, shpresojmë që mund të tregojmë shumë punë dhe të mësojmë nga njëra-tjetra”- theksoi Estrada. 

 

Ndërkohë, Sari Enderson, përfaqësuesi i BB-së, tha se Maqedonia ka Kadastër të Patundshmërive që është shembull në rajon me suksesin e reformave dhe se ka shumë të ndajë me vendet e tjera.